六月二十七日
香港天氣唔多好呀 聽日就出發
楽しいhokkaido - 準備出發!
Hi hi! 隔左八個月冇見 大家好嘛? 我係阿ti呀!
當大家見到呢一個page嘅時候 我地已經上左飛機喇
呢次係我第二次搭飛機 心情依然興奮同緊張呢!
諗返上次嘅東京之旅 mami同嗲地都玩得好開心
佢地一致認為上次嘅trip我表現得好好呀 Pass!!!
所以去完東京冇幾耐 就已經plan緊今年會再去旅行
未諗去邊度之前 我偷聽到佢地講野 :
嗲地話去邊都冇所謂 但個trip最好唔過五日
因為我始終都仲係細個 驚我掛住屋企唔識講喎
仲話若然我今次表現都pass 下次可以去個長d嘅trip
mami隻眼發晒光 打蛇隨棍上問嗲地 :
如果阿ti今次聽話 下年可唔可以join埋xx朋友去歐洲自遊行呀!
我一聽到就搖頭 唉! 我mami就係咁 今次都未玩完就諗下次
都生埋我架啦 點解仲會咁貪玩嘅呢?
到時我都要返學啦 去乜鬼歐洲丫…長洲就得
但以mami嘅性格 佢肯定會幫我請假 ~_~
佢份人要做嗰d就實做到為止架!
算死草嘅mami一味喺度搵d貴嘅旅行團
因為我未夠兩歲 收infant 價錢 好抵玩架
咩西班牙啦 歐洲啦 美國啦 總之貴嘅佢都諗
本來我地都有諗去美國 歐洲架 但早嗰排爆豬流感 mami卻步…
睇左好多資料 年年暑假嘅北海道團都比較貴
因為有花睇嘛 好多人都訂機票去
同埋睇得花都七八月 一定係暑假 冇得走雞一定貴
所以算到著嘅mami決定去北海道 哈哈哈
今次會係我最後一次以infant嘅身份去旅行
mami成日同嗲地講 就算下年再去玩
我都唔再係嗰個扭住patpat嚟行嘅bb喇 冇咁得意
所以佢地都好珍惜呢次旅程
乜同bb去旅行真係咁得意架咩?
好啦 見mami呢排返工唔開心 今次遊記由我”攬上身”啦
有左上次東京嘅經驗 今次嘅遊記應該會寫得更加好嘅
拿 上幾個page mami已經寫左玩d咩
不如今次等我透露下mami執行李嘅清單啦
談舒nine帶備物品清單:
有關食嘅 :
和光堂奶粉一共15包
奶樽三隻 (本來想帶杯唔帶奶樽 但Tiba反對 驚阿ti飲唔慣)
小水杯
餅餅
提子乾
麵飽超人軟糖
便當飯兩盒作後備 (喺kiroro resort有法國餐 壽司餐 驚冇野啱大小姐食呀)
有關用嘅 :
士的車仔 (帶唔帶好呢? 仲未諗好 …)
平安藥 (退燒 止疴 止嘔…)
平安油
茶樹油
titi自家牙刷
Sun Block
止癢蚊膏
驅蚊帶
防水長口水肩
尿片 (麵飽超人學步寶寶)
相機 X 2
腳架
有關扮靚 :
母女裝太陽眼鏡
母女裝太陽帽
母女裝一套
親子tee
阿ti麵飽老超泳衣
麵飽超人水泡
毛巾浴衣
阿ti自家睡衣
仲有幾廿套衫仔裙仔鞋仔襪仔褸仔….
好喇 我要走喇 眼見香港日日都有豬流感確診
初初都好擔心會去唔成 但好彩最後都可以出發
希望今次坐飛機耳仔唔會痛啦 上次痛死我呀!!!
公公婆婆yee ee聰少bye bye喇! 我會合作聽話架喇
大家都要保重啊 阿ti會好好照顧mami同嗲地架喇
你地一定要掛住我呀 唔準唔記得我架!
返嚟之後 mami學四奶奶話”咩都唔做淨係做兩樣野”
就係幫我戒片同裝修我間房…哈哈 期待期待!
bye bye!!!!!
小
