十三個月至十四個月閒記
十月五日 大雨
假期第二日 titi依然喺婆婆度訓 一樂也 呵呵
ti爸訓到c豬咁 十二點先出到門口 喺荃灣接晒佢地班靚仔靚女
咁大雨 ti爸話去探太婆 都啱嘅 落大雨 太婆一定好悶啦
講到呢度 mami一直都覺得自己好孝順 呢樣冇讚錯自己架
一星期裡面 我會陪titi嫲嫲 爺爺飲茶 會搵titi婆婆 公公
我地未試過超過兩星期唔見面 好多時mami仲搞到兩家一齊玩
打麻雀 打邊爐 bbq 飲茶 mami同爸爸總會安排節目比佢地老人家
可能自細titi婆婆孝順 mami同yee ee自自然然鐘意家庭樂...
去到大埔 例牌食熟食檔嘅粉麵 但今次水準差左好多
下次可以試其他舖lu 得閒search下openrice先
飽飽就落樓下街市買海鮮 象拔蚌 大蝦 羔蟹 帶子 日本蠔
咁多靚海鮮都唔洗二百蚊 仲要係好好好新鮮架
除左海鮮 仲有生果 titi去到生果舖 一望 一指 哇 strawberry呀
mami一望 衰妹丫 有柄士多啤梨 好貴呀!!!!!!
(紀錄下先 titi十三個月頭識扭人買野 一見到心頭好就攞
如果佢攞比你 而你又放返抵 佢會喊 c都指住要買嗰樣野
如果佢發現你唔肯買 就會扭第二個抱 要第二個買.... )
mami冇理titi 走去買凍肉 點知唔夠三分鐘
titi好開心咁抱住個紅色膠袋返嚟 噢 聰哥哥!!!!
見聰哥哥買左strawberry mami又心思思買左福岡巨峰堤子
喺太婆度 titi好興奮 係咁推櫈 訓床 玩到癲晒咁...
mami好幾次好替佢驚險 未行得穩就想跑咁呀 嚇c人呢
坐左兩個鐘 我地走lu mami見太婆好唔開心 : 走喇?
mami唯有同佢講 : 我地好快再嚟探你啦 ^^
離開嘅時候 mami有d黯然 突然好驚有日變婆婆
等左好耐titi同個孫嚟探自己
mami會唔會好唔開心咁問 : titi你走喇?
而titi就話 : 我地好快會再嚟...
呀!!!!!!! 好驚呀 唔想咁快冇牙食野 行得好慢 冇得去玩.....
所以都係及時行樂 帶多d titi去探四大長大
等佢第日有樣學樣會多d嚟探我 呵呵
返到荃灣 大家準備好海鮮邊邊大餐嘅心情....
1 2 3 開始!!!! 一家人打邊邊都係最開心嘅 yeah~
titi一味指住個煲 : 辣辣....辣
然後拍心口呆望我地 : 驚驚
哈哈 衰妹見到出煙叫辣 但有時摸到凍野都叫辣架....
沒有留言:
張貼留言