給我們的小諾兒:
bb 你終於半歲大啦 能夠睇住你長大 係mami同爹地嘅榮幸
好開心日日都可以陪你玩 陪你睇書書 聽音樂 至titi豬入睡
mami由你未出世到依家 每日都update住呢個blog 要努力記底你成長嘅每個stage
例如你食幾多奶啦 幾時轉身 幾時出第一隻牙仔 幾時識得笑 幾時叫我一聲媽媽!
好令日後睇返 記得所有事 回味到從前嘅所有感覺
bb你有冇發覺mami一直用口語化去記事呀? 好似個 "不"字會用 "唔" 字 "
看字"會用個"睇"字
因為咁樣先係寫日記嘅感覺 唔似作緊文呢 嘻嘻
喺blog裡面 mami唔會用成語 唔會有文筆修飾 淨係用最自然親切嘅語氣
去記底mami照顧你嘅一點一滴......希望你睇嘅時候 好似mami同你講緊野咁
咁樣你會睇得舒服d 容易catch到mami寫嗰陣嘅感覺
bb 其實mami都辛苦架 返工嗰陣 會諗整咩比你食好呢
買咩衫衫 點樣安排你日後嘅學習旅程 買書書 玩具
一放工就跑住咁返嚟照顧bb你 (ti嫲都叫我唔好跑過馬路 哈哈 教壞細路)
很早之前 mami已經幫你鋪好幼稚園同小學嘅路 都係港島東最好的學校哩
(其他分行同事認識嗰個校長呢 都唔該晒同事啊 )
路就鋪好 之後你點走 就由得bb你自己發揮啦 我絕對唔會比壓力你
即管發揮你嘅小宇宙 總之唔做壞事 就冇問題啦
mami要做嘅 都做足晒 之後就睇你自己造化啦
放心 如果你跌倒 我地必會陪住你重新站起 替你好好加油!!!
自從你出世 mami就盡量做好本份 做一個好媽媽 稱職嘅媽媽 我要 :
行善積福 多做善事 ~ 咁bb你都會活在福蔭下
不會胡亂批判別人 ~ 一個愛批判別人嘅媽媽 她的兒女也會有樣學樣呢
多做事 少說話 ~ 用行動證明疼錫兒女
愛titi 但唔係溺愛 ~ 溺愛 瘋狂去愛一個人的話
一旦失去 人就容易迷失 後果嚴重 (touch wood)
mami有無數嘅缺點 bb 你比時間mami去改 去學習
mami有時有點煩 bb 你就讓我間中發發脾氣吧
mami有時累了 bb 你就抱著mami 哄哄我吧
mami有做錯的地方 bb 你提點mami吧
mami和爸爸拍拖 bb 你要安靜待我們回來呢 我地拍拖嘅同時一定有掛住你架
titi豬 你可以話mami係一個好自私嘅媽媽 我係唔會為你放棄我熱切追求嘅野
希望你會明白......
每個人都係一個獨立嘅個體 出世自己一個嚟 離開都係一個人走
公平地 每人都有一條路要走 mami亦有一條等我行嘅路
mami愛工作 愛旅遊 我係唔會為左你而放棄呢兩樣野
雖然唔放棄 但mami會盡量喺兩者取得平衡 盡量安排妥當
工作 : 我會盡早收工 多d時間陪你
若要轉工時 盡量唔揀要返shift要返假日嘅工 令你生活定時定候
旅遊 : 由以前一年兩三次外遊 到依家一年會去一次 或者同你去
好啦 最後 ti爸同mami決定左 到titi識講野 懂性之際
我地就會問titi豬你一個問題
你要唔要細佬妹呀?
呢樣就等titi豬你決定啦 好冇?
點解mami今日咁多心事咁 交代咁多野?
因為世事無絕對呀 我好想喺度向七歲去世嘅男童家人問好
這件事令我唔開心左兩日 心很不舒服
希望他的家人放開一點 亦希望男童走好.......
溺愛真的不會是一件好事 將給baby嘅愛分點給其他人
這樣是對自己好
記緊啊 真愛跟溺愛是不同的.....
愛得理智便是愛得聰明
今天媽媽累了 也傷心極了 難過了.......
七歲男童的家人 原來是mami認識的客人哩
沒有留言:
張貼留言