兩歲半的爛gag

阿ti最叻就係整蠱人 每次成功都會奸笑 嗰個認叻樣真係好好笑架

近排嘅爛gag :

Monster

monster喺阿ti心目中係怪獸 係一d恐佈嘔心嘅野 而呢排會用嚟形容三隻小豬嘅狼

阿ti有一晚講故仔 佢話:

從前喇喎 有一日啦 有三隻小豬食mummum 跟住...有隻monster嚟左喎

tiba tima一向主張阿ti講中文多過英文 想佢講"有隻狼"嚟多過想佢講"有monster"嚟 於是我地都即刻問 : monster? monster係咩嚟呀?

阿ti好快咁答 : monster係英文嚟咯  (佢講完即刻奸笑 佢故意整蠱我地架!!!)

我地扮嬲 : 你唔講monster係咩嚟 我地唔聽你講故事喇

阿ti再奸笑 好肯定 : monster係狼嚟呀 鳴~~~~ (仲扮埋狼叫 吹脹)

tima tiba : ~____ ~

幼兒院

有一晚 tima問阿ti : 你鐘唔鐘意xxx幼兒園 (讀緊嗰間) 呀?

阿ti一聽到 即刻扁晒嘴 : 我唔鐘意呀

tima好驚 唔通返學比人蝦? 即刻緊張咁問 : 點解呀？唔解唔鐘意xxx幼兒園?

阿ti唔望tima 好委屈咁 : 因為d老師唔好呀

tima更加緊張 : 吓? 老師打你? 定鬧titi呀? 老師有咩唔好?

阿ti呆呆的答 : d老師真係唔好呀...

tima心諗 老師唔好 咁同學唔知有冇蝦佢 於是概括咁問: 咁你鐘唔鐘意返學?

阿ti表現得好興奮 : 鐘意呀 我好鐘意呀!

tima心感欣慰 好彩仲鐘意返學 : 鐘意返學呀? 係咪同d同學仔玩得開心呀?

阿ti望望我 奸笑 : 因為d老師好好呀!

tima :　~____~

百佳超市

新年到喇 tiba同tima去辦年貨 通常都去最近嘅百佳超市

阿ti見到人用紅紙包糖果餅乾盒 都表現得好興奮同好好奇

上到車 阿ti肉緊咁攬住份禮 望一望花紙上嘅logo : 媽媽 媽媽

tima隨口應 : 咩事呀?

阿ti用手指仔指住d百佳logo : 呢個係大百佳 (大d嘅百佳logo) 呢個係小百佳 (細百佳logo)

tiba tima 公公婆婆都爆笑 : 咩小百佳呀?

阿ti高興到不得了 : 呢個咯 呢個小百佳...

我地正想笑之際 阿ti即大聲唱 :

Happy Birthday to 小百佳 Happy birthday to 小百佳 happy birthday to小百佳

happy birthday to 小百佳

哈哈哈 笑到我地肚痛 tima即刻拍左movie 未upload得切 下次再post啦

今次笑話講到呢度 仲有好多笑話下次再爆佢出嚟啦