羅馬 ♥ 許願泉

4 July 2012



離開左靚靚嘅鬥獸場 (一離開便懷念了)

我地坐好短嘅車程

就到左另一羅馬名勝地 -  許願泉 (Fontana di Trevi)

好緊張啊 好興奮啊 又表露大鄉里嘅一面tim


mami之前同我地講  喺呢度好難影到靚相

因為一年三百六十五日都咁多人

而地方又好迫 扒手又多

所以mami講明 如果一陣有機會合照就要笑喎

okay 收到 我一定會合作嘅


落左車

Patrick哥哥帶我地入左一條充滿意大利feel嘅窄巷

coffee味啦 pizza味啦 係咁樸鼻而來

mami仲同我講  呢度有好最好味 最出名嘅正宗Gelato食呀

 

 

一睇條巷就知幾咁多遊客嚟睇泉啦

呢度係高危區 小心扒手啊

 

行左幾分鐘窄巷

突然前面一堆人企左喺度 mami大叫daddy

哇 我都見到喇 係mami之前介紹左比我睇嘅許願泉喇

原來親眼見到係靚咁多  震撼咁多

仲有呀 原來個泉都好大個架bor!  
 

見到啦 !!!!

許願泉又叫特拉維噴泉

中間海神指揮住分別騎住兩隻海馬嘅人魚 (triton)

側邊係豐收神同埋健康神 

點解呢度咁出名  其實係因一套《羅馬之戀》

主題曲都有得唱啦  Three Coins In The Fountain

嚟拋三個coins先叫許願架 

而點解mami咁鐘意呢度?

咪又係中左衝上雲霄毒lor~~~~~  


 
 

 

 

 

《羅馬之戀》Three Coins In The Fountain

我地都要喺度許返三個願先

等我教大家點樣許願先為之正確啦



首先好似我咁右手揸住個coin  背對許願泉

右手揸住個coin繞過左肩拋入泉中

 

記住喎  第一個願望要重返羅馬

咁之後許嘅願先靈驗架

信不信由你啦

 

 

以下嘅相會令大家妒忌

因為全部相背景都冇其他遊客架!!!

呵呵呵  點解我地可以咁厲害可以影到d冇人做背景嘅相呢?

要知道圍住許願池嘅人有幾多

我地真係好厲害啊!

如果唔諗諗計 影出嚟張相都迫爆人架

唔信好多人? 唔信d相會迫爆人?

麻煩你碌返上少少

睇下我地初初一到步影嘅全家福

咁你就會發覺下面d相幾"堅"喇

 

雖然好似好多張相

但其實都係用左幾分鐘時間影架咋

事關真係好多人望住我地

而且好多扒手近泉邊企架

所以好多相都見到mami襟實個袋

 

 

呢張係daddy幫我用手機影嘅

我係唔係好少女好lady呢?

 

拿 我冇講大話架

張張相都有笑交足功課呢

mami最鐘意下面呢張喇

佢話冇人做背景之餘 我笑得好甜喎

 

 

許願泉嘅泉水被人叫做 " 處女之水" 

因為以前有羅馬士兵征戰返嚟 口乾喇

途中遇到一位少女帶佢地嚟許願泉飲泉水解渴
 
一個帶嚟好運嘅泉變成許願泉喇

哈哈  我呢就唔會飲許願泉d水嘅

但嚟到就摸下冰涼嘅泉水

泉水除左冰涼 仲好清澈架

個泉裡面有好多唔同國家嘅coins呢



 

bye bye喇

許願泉 我地許左願 真係要達成啊~

鏡頭一轉

我地去開餐啦

因為要食意大利最正宗嘅pizza同Gelato咯

我恨左食gelato耐

而daddy就最想食pizza

 

daddy向佢嘅pizza進發

意大利嘅pizza比較薄 熱辣辣

yummy

 

daddy食左兩大塊呀 一塊蕃茄 另一塊係cheddar



跟住到我喇

呢間雪糕店係最多人食架

裡面人山人海啊

我叫左朱古力同哈蜜瓜味

本來mami諗住同我兩份架

點知食食下決定自己叫返杯

拿  (上圖) 冇講大話架 間雪糕店人山人海呢

點知我地再入去居然冇人喎

我地仲可以喺度影返相



雖然有咁多種口味  但mami諗都唔洗諗

 

揀左cup食 菠蘿雪葩同奇異果味

非常好食 酸酸地 very good~