生仔咁容易?

今朝一起身餵奶 哇 天旋地轉 d血未到腦咁 仲要有d冷汗咁

我生左都有二十日啦 有進補呀 (係有飲少少凍野o者) 但點解身子仲係咁差呢

聽人地講生仔用既時間愈長 復原既時間就會愈耐

我生左十四個鐘 係唔係有排先好得番呢?

準備生bb既準媽媽 生仔真係唔係容易啊 要天時地利人和呀~

1. 拍拖拍啱人 你會亦準備同佢結婚 (mami同爹地拍左兩年幾就準備結婚啦)
2. 結婚結啱人 你甘心幫佢生仔 (2004結婚)
3. 埃及旅行後 去左人生一個長而無憾既旅行 就準備要titi啦
4. 懷孕前檢查 (2006 家計會)
5. 成功中左 (2006 十一月)
6. 戒口 四個月死忍爛忍口淡既辛苦 (好彩mami冇嘔咋 如果唔係仲辛苦)
7. yeah 過左四個月 小器期過左 bb你安全啦 (嗰陣真係有咁諗 傻mami)
8. 5個月至七個月係最舒服 只係要吸取多d營養 每個月都需要吸取唔同既營養
9. 經過咁多個月陀住bb周圍去 覆診 去街 會有d唔捨得bb離開自己母體
話晒踢左你咁耐 你又隔住肚仔同佢傾左咁耐計
10.最後兩個月係最辛苦既 特別最後一個月 成個人d骨散晒 仲要墜住墜住
11.到生個陣 唔洗問一係痛慘 一係捱兩刀
(但我個人認為情況許可自然分係最好 話晒自己生 唔係医生幫你攞出黎
        雖然係痛 但自然 同埋bb經過媽媽子宮收縮出黎 會特別激發bb出世既感觀)
12.生完咯 要補身 因為身體真係會差好多 仲要打理好傷口 照顧bb
眼見有d開刀既媽媽唔顧自己既傷口 照樣抱起bb 可以話佢有母愛
但另一方面咁做係好傻架 生完bb最首先要好好調理自己身子
bb有好多人可以幫手照顧嘛
13.bb食夜奶 "夜麻麻"起身餵奶 餵完佢仲唔訓個下都好慘架
14.寫緊blog 小ti係咁喊 好似依家咁 都有點吵呢 嘻嘻
15...................
16...................

仲未計第日讀書 出黎搵野做 拍拖 結婚............

呵呵 我呢個mami愈諗愈遠咯 都係做番依家要做既野 抱下titi先 佢喊到咁

養兒一佰歲,長憂九十九 係好啱架 ......

睇下四大長老依家仲要擔心埋個孫就知啦 哈哈

令我地長憂既諾兒bb 祝你快高長大!