十二月一日 天色好好呀 但好凍呢
楽しいTokyo -DAY THREE- 富士急Highland
雖然離開富之湖 但富士山一直都冇離開過我地 去富士急highland嘅途中 富士山都跟住我地呀 佢真係好靚 媽咪同嗲地好努力咁沖奶比我飲 諗住可以一邊飲 一邊訓一陣 點知原來車程唔夠十分鐘呀 搵笨咩 沖得奶嚟都落車咯 唯有邊行邊餵啦...
媽咪同嗲地好耐之前都去過富士急喇 一次落大雪 一次就玩得好少野...今次同埋我呢隻化骨龍去 百般滋味在心頭呀 梗係啦 多左我嘛
聰少一去就就話要玩過山車 琴晚聽嗲地講過呢架過山車都好高好驚架 但呢個時候嗲地居然話唔驚 仲話唔係好高啫...搞到yee ee心思思想玩 我好想提佢唔好上當呀 但我唔識講 嘻嘻...好彩媽咪暗中同yee ee講話好驚 yee ee先決定唔玩咋 如果唔係 yee ee一定叫到飛起喇 哈哈哈
聰少同嗲地買左 Big 3 可以包三樣野玩 第一樣挑戰嘅就係全世界最高嘅過山車 媽咪同yee ee為表支持 陪佢地上三層樓幫佢地影相 加油喇 唔好大叫呀....
喺佢地貼錢買難受 自己比錢嚇自己嘅同時 我想食雪糕tim 公公 有冇樹多比梨味呀?
果然 到佢地嘅時候 聰少大叫呀 遠到咁都聽到 哈哈哈 笑死我地喇 有冇人叫得咁大聲 低b架 媽咪好努力幫佢地影相 可惜枝鏡頭問題 影得唔遠呀 呵呵
過左一陣 佢地落嚟喇 c雞撐飯蓋 兩個都話好好玩 仲話想玩多次 哼 我就唔信喇 媽咪冷笑一下 就抱左我睇旋轉木馬 木馬好靚呀 好想玩 但佢地話我唔玩得 所以冇得去 唯有下次啦...
之後我地去左thomas land 上次媽咪冇嚟到呢度呀 原來呢度比佢地想像中細 得幾架火車頭火車 商店...於是佢地影左幾張相就走lu 我都唔係太鐘意呢度 走都好嘅 ^^
離開thomas land 洗手間途中 見到牛奶妹cafe呀 一個客都冇嘅 奇怪奇怪...
我地仲去左華納影城 我見到翠兒 翠兒同我個名一樣架 都係叫 Titi 好親切呢 華納影城隔籬就係溜冰場 日本人好注重親子關係呀 連溜冰都同埋小朋友 非常好呀....
行左一陣 去埋洗手間 就見到鬼太郎先生喇 媽咪初初仲估我會驚 點知我一d都唔驚 仲周圍摸周圍走 好似好開心咁呢 我最鐘意隻大眼 好得意呀...
離開鬼大郎先生屋企 聰少話要去玩高卡車 於是我地又去玩咯 點知玩完佢地呻笨 一d都唔好玩 同澳門嗰d爭好遠呀 好彩唔係貴啫 嘻嘻
食lunch之前 媽咪話想去哈姆太郎地帶呀 見人地d相好靚 點都要見識下喎 行左一陣 終於到喇 真係好唔錯喎 有個哈姆太郎小公園 仲有哈姆太郎摩天輪 我一見到摩天輪就指住要玩呀 於是媽咪好快手咁買票陪我玩 錫晒媽咪 上到去見到公公婆婆嗲地同我揮手 我好開心呀 哈哈 titi好高呀 而佢地好矮 好快就轉左兩個圈 落返去lu...bye bye啦小小摩天輪 下次見!!!
行晒成個富士急樂園lu 我地趕住去食午餐 今日食海鮮火鍋呀 有日本豆腐啦 長腳蟹啦 帶子啦...佢地仲分左d烏冬比我食 好滑呀 好好味 多謝婆婆 睇返嗲地媽咪係咁吮蟹 都唔理我喇 都係婆婆好 去到邊都以我為先 所以我都係最鐘意跟住婆婆 穩陣!!!
食完海鮮火鍋 我地行多陣就走咯 臨走之前 yee ee同媽咪買左枝特式雪糕條 我試左一啖 媽咪諗住攞返之際 我就大喊啦 仲咩搶我野呀 好好味呀 titi唔想比你地呀 我好鐘意食 你地就我一次得唔得啫...鳴鳴
可惡嘅yee ee同聰少後尾哄我比佢地食 初初我唔比 後嚟見枝雪糕好凍 就比d佢地食啦 點知原來媽咪落左聖旨 佢地食晒我枝雪糕!!! 就係咁 我成枝雪糕比佢地食晒 好唔甘心呀 抵佢地凍死呀!!! 蝦titi冇好下場架...
女人真係麻煩 臨走仲去掃埋富士急間shop 仲要買到野先抵c喎...唉...今次連婆婆都癲埋 係咁掃貨呢...
沒有留言:
張貼留言