十一月三十日 天色依然晴朗 心情異常happy
楽しいTokyo -DAY TWO-PUROLAND
好野 我一覺訓到天光 初初仲唔想醒 係公公咯 佢吵醒我 嬲呀!
(回顧一下琴晚先)
琴晚我同公公婆婆訓呀 唔係媽咪嗲地唔理我 而係佢地執唔切野 第一晚好多野要執 所以我十分樂意同公公覺豬 訓覺前婆婆仲幫我白白呢 哈哈 我呢4日都係沖花灑 佢地一個負責捉實我 一個係咁搵花灑淋我 好似幫豬仔沖涼咁 玩到好開心呀 仲笑到咭咭聲!
白白之後我就逐間房巡 佢地三間房門都開晒架!!! 首先去媽咪度 見佢係咁執野 好似好多搞作咁 好悶呀
於是我走左去yee ee嗰邊 哎呀 佢都係執緊野今晚都唔...點解d大人去到酒店咁悶架 個個都執野
我返轉頭 特登踢門等媽咪望下我 踢!!! 哈哈 媽咪過嚟喇 佢輕摸我臉仔 同我講 : titi 呢度唔係屋企呀 你未嚟過架喎 驚唔驚呀? 我搖搖頭 車 媽咪你都傻架 見我咁開心 仲擔心我嚟到呢度會覺得陌生 會不安 好想同你講一d都冇呀!!!
媽咪笑一笑摸摸我個頭仔就行開左 唉 我諗媽咪今晚都係唔得閒架喇 都係mark住聰少玩穩陣 哈哈 我去左yee ee房度玩 好開心 聰少係咁轉我 係咁抱我飛 仲騎牛牛tim
噢 講到一覺訓到天光就扯開話題tim sorry呀下 繼續day two先 ...
一覺訓到天光 婆婆幫我換好衫 就落去酒店食早餐buffet 嗰度有好多野食呀 但我淨係食得奶奶咋
媽咪喺冇咩胃口情況下都攞左兩盤野返嚟 好野!!!
見佢地食得咁開心 我都強烈要求食日本飯飯 好心嘅yee ee幫我攞左少少白米飯 我愛你呀 yee ee!!! 我急不及待食一小啖 哇 好好味呀 d飯圓圓地 軟林林 同屋企食嗰d好唔同呀 於是我係咁食 係咁食 食左半碗飯 飽到ti媽唔認得呀...
飽飽之後鴨仔就上晒車準備出發咯 臨走前媽咪仲去影相 激死人喇....
媽咪喺車度講 : 真係冇諗過去日本會跟團 但好彩今次唔係自遊行 一日都好累啦 依家快d哄個女訓 車程一個鐘去多摩puroland 佢訓醒就到 可以影到相 可以睇野同玩.......如果下次得我地兩公婆帶titi 就唔去旅行 頂唔順呀 大佬.........媽咪好似喃嚰咁 係咁同嗲地講野 而我就成功比佢嚰到覺豬左...
話時話 我有樣野好叻架 就係聽煞車泊車聲 一聽到呢d聲就自己起身架喇 一覺醒嚟 d團友讚我對眼仔好似龍眼波子咁大咁圓 媽咪例牌雞啄唔斷 ...今次40人 有四個bb小朋友 我一個都冇接觸過 而以媽咪咁鐘意講野嘅人 都冇咩接觸其他團友 傾嚟傾去得個大緊肚嘅媽媽 全程d人都各自各咁...真係唔似跟團呀....
喺小泉生帶領下 我地去到Puroland 即係香港人所講嘅Hello kitty land喇 喺我印象中 媽咪係好憎kitty架 佢嘅最愛係minnie呀 但媽咪話驚我大個會鐘意kitty 所以都幫我整個kitty造型去玩 等我大個睇返d相會好開心喎
嗲地接過pass 車 都唔靚嘅 好似大陸主題樂園嘅入場券 小泉生仲比左d cash coupon我地 可以用嚟開餐 亦都可以用嚟買野 對返錶 我地有三個鐘喺度玩 都好夠時間丫
入場之後 我地身處三樓 係最多人物供拍照嘅地方 媽咪搵左好耐都唔見kitty呀 xo呀嗰d最hit嘅人物 等嚟等去都係得d二打六公仔 最出名都係jimmy同jenny 而kiromi都係最後先有 仲要一出嚟就排好長隊等呀 可能今日星期日多人卦 唔緊要啦 我地落到最低嗰層玩過先
一落去到 第一時間見到嘅就係洗手間 d人講得啱呀 puroland嘅洗手間真係好靚架 好似置身格林童話世界裡面 度度都有魔法 度度都有彩光咁....洗手間轉右轉左都係以食做主題嘅房間 有朱古力房間 糖果房間 冰淇淋房間 麵飽房間等等
離開咁靚嘅特色房間 媽咪抱住我睇日本小朋友做show d音樂好好聽 之後仲睇巡遊呢 我表現得好陶醉 好開心 拍晒手咁 見到我咁開心 媽咪好滿足咁錫左我好多啖 媽咪...你好錫titi呀 謝謝!!
公公見我同媽咪咁溫馨 就唔抵得抱走我 同我去扭波波 哇 一排扭旦機 我指住其中一部旦機 公公扭出嚟每隻扭旦都係kitty頭嚟架 我抽左橙色同紫色之後 就比媽咪喝止 話公公扭咁多...我拍拍公公 唞大氣 算啦 titi唔要喇 唔洗抽 個個見我咁做 都笑到趴晒喺度 指住我話我老積呢
揸住個扭旦 媽咪沿路幫我影相 去影kitty house呀 kitty house出面架大kitty車呀...一路上我得到好多日本少女嘅注視 個個都指住我話我kitty生 又唔知咩咩生咁 又話我咩"夏威夷"...唔明呀!!! 我淨係想日本少男bb注視我 而唔係日本少女呀...
媽咪同我地排kitty house 35分鐘先可以入去 入去之前媽咪同我去press kitty嘅門鐘
入到去 哇 真係好靚呀 連媽咪唔鐘意kitty都癲晒 成個低b婆咁 張張凳都話靚 kitty個洗手間又靚 張床又話靚 唉 我都係落地自己參觀好喇.....我去到邊嗲地就影到邊 而媽咪呀 yee ee 婆婆都側邊發晒癲...kitty小姐 你就好啦 間屋咁靚 我都想有間pink room呀 唔知媽咪幾時幫我diy呢?
媽咪點都要同我影呢張櫈 但又趕住去左排全家福 唯有轉頭先補一張啦
到我地喇 行到去kitty house嘅尾尾 kitty小姐喺度等我地呢 難得有人揸機 一張全家福丫 阿lee架多~~~
拿 我都話媽咪會同我補拍架啦 佢份人要做嗰d一定做到 唔知第日我似唔似佢呢d性格呢?
跟住媽咪又逼嗲地同我影 唉 算啦 人地唔想影就咪搞人啦 你自己同yee ee影餐飽啦
媽咪又嚟啦 又叫日本先生幫我地整張全家福 人地日本先生唔識搞你部相機 搞到人地鬼咁唔好意思
呢個kitty信箱可以比你寄封全kitty嘅信返屋企 由信紙 信封 stamp 到 chop都係kitty 型到爆炸呀!!! 蚊ee 呢個moment 媽咪諗起...唔記得你地扯呀!!!!
一路行 公公一路同我玩 搞左好耐先上到去玩最出名嘅boat ride 我地唔可以六個人一加 boat呀 分左兩架boat 裡面d公仔好靚呀 媽咪見到xo媽媽打xo最開心 仲係咁話xo媽媽好肥 嘻嘻 媽媽 你都係爭十磅未減 唔好話人地啦...
玩完boatride 仲有時間 媽咪突然brainstorm到d咩咁 抱住我直衝上樓梯 嗲地都跟住衝上去 哦 原來想幫我整素描
嗲地一直都想喺黃金海岸檔幫我整張素描架 依家喺度素仲有意思 仲特別啦....嗰度有三個畫家 肥姐姐一見到我就好nice叫我坐低...於是titi嘅第一張素描....唔洗十分鐘 得左!
有冇見肥姐姐張咭片呀 都有佢自己嘅自畫像架 媽咪最欣賞佢畫埋我嗰日戴嘅kitty髮夾!
哎呀哎呀 唔記得交代嗰日嘅lunch tim 我地用晒d coupon去滿足媽咪同yee ee嘅慾望 佢地買晒d貴夾唔好味嘅野食呀 一味貪人地d盒呀 杯呀 ...佢地一邊笑住睇d盒 一邊皺晒眉話好難食 兩姐妹都低b架!!!
為左滿足佢地影相嘅慾望 夾硬擺份兒童餐喺我前面 點食呀? 都唔啱我 我唔食呀 拎走呀!!!!!!
最後十分鐘 媽咪醒起兒童game city 即刻衝落去睇下 原來同一般game zone一樣 只不過呢度d搖搖馬係kitty嚟嘅 所以媽咪冇比我試玩 淨係影d相就算咯....
Puroland係一個唔算大嘅室內主題樂園 裡面有陪住大家成長嘅 sanrio公仔 青蛙仔 大口仔 kitty ...
媽咪嗰日見返小學鐘意嘅eddie & emmy 開心到差d想流眼淚 真架 見返曾經好鐘意 但被遺忘左嘅野....嗰種感覺 媽咪話好震撼...
再見喇 puroland 現階段嘅我淨係識你地嘅 "貓貓" (kitty) 每次見到佢 我都情不自禁指住大叫 "貓貓"!!!
沒有留言:
張貼留言