♡ 楽しいhokkaido-Day One-定山溪 ♡

六月二十九日

札榥清涼可愛 定山溪天氣良好

 

♡ 楽しいhokkaido-Day One-定山溪 ♡

 

一落機 媽咪好心急開喼倒水比我飲喇 由第一日至第四日 我都係飲香港嘅水 佢地話軟水同硬水始終有別 未煲過嘅 都驚我肚仔痛 破壞大家興致就唔好啦 都係帶三樽水好d 同行嘅媽媽都係咁 仲要大家都係帶屈xx tim 嘻嘻  ....

未講今次團友tim 一共三十一人 唔計我地 仲有兩個family有小朋友架 一個三歲大嘅姐姐叫Ashley 另外仲有兩個哥哥 喺加州返嚟架 佢地都講英文 識少少中文咁啦

               

札榥唔係太凍 姑媽好好呀 喺媽媽執喼嗰陣 買左枝橙汁比我 呢啖係我第一啖嘅北海道果汁 而姑姐就比左d cc leomon比我飲 我好鐘意呀 一邊等旅遊車一邊飲...

               

好快架車就到喇 大約兩個鐘車程就到目的地 ~ 定山溪 呢度係一個好大嘅溫泉區 同登別都有得揮架 嗲吔媽咪honey moon嗰陣去過登別 依家去埋定山溪就perfect喇!

攞左key上房 媽咪一打開門 哇!!! 大家都好鐘意呀 好開心呀 間房好大好靚 我都係第一次要訓榻榻米咋 上次去富士山間酒店都係訓床 今次就真真正正試下訓"地下" 嘻嘻 我最鐘意訓地下架喇 難唔到我丫!

                 

拿拿聲換完衫 我地就落去食一個絕頂正嘅自助餐 全晚嘅食物都好好呀 一d都唔似跟團食嘅野 有佢地最愛嘅甜蝦刺身 牡丹蝦刺身 南蠻蝦刺身 章魚刺身 吞拿魚刺身 統統都係任食 特別係蝦嚟講 d蝦唔係平價蝦 有好多都有靚蝦春架 佢地食左好多... 而我就反而食意粉同肉肉 仲有雪糕 之後我見到佢地狂食chesse cake  哈哈 一家人又食又傾計 好開心!

    

    

 

食飽飽 我地直情著左件浴衣去行街街呀 一路上見到好多有關河童嘅野 可惜天黑影唔到 唯有聽朝早d起身睇啦...

去到便利店 我地買左定山溪繪馬啦 零食啦 仲有花火呀!!!  媽咪一早問定導遊哥哥 哥哥話第三晚嘅酒店可以玩花火 於是我地買左手揸花火 留返第三晚玩!

姑丈嗰晚買左力力 (朱古力)比我 仲有啫喱 原來姑丈都好好人架 我開始鐘意同佢玩 但始終唔敢比佢抱...

 

返上樓 媽咪飲左一包明治鮮奶 佢話好好好好味喎 而大家都陪我玩左好耐 哈哈 大家有冇見到我著浴衣呀 導遊哥哥醒架 呢件係最細嘅碼 靚唔靚呀? 同佢地嗰件一樣架! 我好鐘意 不停fing袖呀 嘻嘻!

                

     

 

媽咪仲set埋stand影張合照先 好好留念 ... 影完相 我一見到榻榻米就癲晒 係咁企起身再撲落d被鋪度  

      

 

佢地比我搞到好開心 最後...我中左頭獎...佢地都繼續笑我 衰人嚟架! 房中大會一直玩到十點幾就各自返房覺豬咯!

    

    

     

     

      

                

我真係要訓喇 聽朝再同大家去玩啦 早抖!

                   

     

                  

   

媽咪就慘喇 去旅行好少訓唔著嘅佢 居然訓得唔好 點解? 因為嗲吔開多左一盞燈 媽咪就訓唔到喇 哈哈!

 

                         定山溪寫真請按此